This poem is dedicated to My beloved Murshid, my teacher, my guide, my Spiritual Father, Janab Hazrat Khwaja Shamsuddin Azeemi,who we call "Babaji" or "Abbaji".......


?Ufaq kay uss paar?.
Dhund kay sheeshon kay doosri oor
Meri tumhari duniya say qadray paray
Iss veeraan hungamay say door?

Ek aur rasta nikalta hai?.
Seedha raasta,
jiss mein kayeen mod hain

dono taraf phool khilay hain
Aur har shajr say paray ek aur shajr khara hai
Har shajr kay haath aasmaan ki taraf uthay hain
Un kay sar, sajday mein jhukay hain

Iss bareek si rehguzar pe kitni khaiyan hain
din kay ujalay mein, kayeen parchaiyan hain
har saaya jaisay musafir ka peecha kartay,
ussay guzray kal say maayoos,
aanay walay kal say na-umeed karta hai
shajr ek deo ki manind nazar aatay hain

phir in se gar bach bhi jayein
to har qadam pe ek naya bhanwar
kahin andhay kunvain ka darr,
kahin. gehray garhon ka khauf
tez aandhi kay andeshay kahin
to kahin sailabon kay vasvasay

aur farz karo iss say bhi koi nikal jaye
to pairon mein mohobbat ki zanjeerein
rishton ka paas, kisi aur kay dil ki aas..
kuch naram aankhon ki namee
kisi kay lub pe rakhi baat, unkahi

har ek ka maqsad ek,tarkeeb juda
kay musafir ko kahin mil hi na jaye khuda

per hain kuch aisay bhi, jo chaltay hain
apni hi dhun mein magan barhtay hain

kisi ki azmat kay saaye mein rehtay hain
kisi ka pak daman thaam letay hain
phir wo rehbar hi musafir ki khatir
har ek mor pe kharay miltay hain
har andheray ko noor kartay hain
har rukawat ko door kartay hain

phir na raasta, na manzil, na safar
na zeest , na maut ka silsila
faqat wahdahu la shareek a lahu
La ilaha IllaAllah, La ilaha illAllah

written by me Sameer